Калядны сюрпрыз. Забаранілі канцэрт Вайцюшкевіча ў ДК МАЗ
Восстановлено из старой разметки, требуется проверка.

Мінскія ўлады не далі дазвол на правядзенне сольнага канцэрту Змітра Вайцюшкевіча ў ДК МАЗ. «Як адкруцілі гайкі, так і закруцілі», — кажа выканаўца.
Упраўленне ідэалагічнай работы і культуры Мінгарвыканкаму не дало дазвол на правядзенне канцэрту Змітра Вайцюшкевіча, заяўленага на 12 студзеня ў ДК МАЗ. Меркавалася, што ў гэты дзень выканаўца разам з гуртом WZ-Orkiestra зладзіць урэшце вялікую прэзентацыю праграмы на верш Генадзя Бураўкіна «Варанок», што выйшла ў 2013 годзе.
Рашэнне аб выдачы гастрольнага пасведчання на гэтае мерапрыемства ідэолагі зацягвалі як маглі. Звычайна арганізатар атрымлівае дазвол цягам пяці дзён, але ў яго могуць папрасіць прадаставіць дадатковыя матэрыялы, датычныя канцэрту і працягнуць разглядаць дакументы лішні тыдзень. «Яны тры тыдні чыталі тэксты маіх песень!» — кажа Зміцер Вайцюшкевіч. У выніку арганізатарам адмовілі на падставе таго, што ў іх адсутнічае дамова з канцэртнай пляцоўкай. Паводле правілаў падачы, дарэчы, дамову такую пры арганізацыі канцэртаў беларускіх выканаўцаў прадстаўляць узгадняючаму органу не трэба.
Адзін з арганізатараў канцэрту Віталь Супрановіч паведаміў, што яны мелі дамову з ДК МАЗ, але ў апошні момант яе спатрэбілася перарабіць — у сувязі са зменай фінансавых умоваў. Якраз у гэты час і была атрыманая адмова ў правядзенні канцэрту. Як стала вядома Tuzin.fm, дырэкцыя ДК МАЗ сама даслала ліст у Мінгарвыканкам, дзе было напісана, што дамова паміж імі і арганізатарамі канцэрту Вайцюшкевіча на дадзены момант не заключаная.
«Як адкруцілі гайкі, так і закруцілі», — расчаравана прамаўляе Зміцер Вайцюшкевіч. Да гэтага ў яго сарваліся яшчэ два выступы ў Беларусі. Пастаўлены ўжо ў план канцэрт у віцебскай філармоніі з ініцыятывы мясцовых ідэолагаў быў адменены, а ў Брэсце ніводная пляцоўка не пагадзілася прыняць апальнага артыста. «Я прызвычаіўся да забаронаў, хоць, вядома, не прымірыўся з імі. Цудоўна разумею, што ідэолагі маюць свой кодэкс, які з усіх сілаў бароняць, але мая творчасць абсалютна не нясе пагрозы і я іх кодэксу не парушаў!» — кажа Вайцюшкевіч, які пасля выбараў-2010 трапіў у забаронены спіс музыкаў. Упершыню легальна з таго часу ён выйшаў на сцэну на прэзентацыі праекту «Re:Песьняры» ў верасні 2014 году, а 29 кастрычніка ў Мінску прайшоў яго сольны канцэрт, узгоднены з уладамі. З нейкага ліха выканаўцу ізноў вярнулі ў чорны спіс, у якім па інфармацыі Tuzin.fm, да гэтага моманту быў адзін толькі самотны Міхалок.



